Utslepp knytte til mat er noko vi sjeldan tenkjer på, men servering står faktisk for dei nest største utsleppa innan reiselivsnæringa, etter transport.
Ved å auke medvitet rundt kva ein tilbyr på menyen, kan ein spare miljøet for store påkjenningar og samtidig oppnå andre positive effektar for reiselivet.
Meir grønt og mindre kjøt
Den beste prioriteringa ein kan gjere, er å auke mengda av grønsaker på tallerkenen særleg framfor kjøt, men også fisk og fugl. Di meir grønt, di betre for klimaet. Enkelt sagt står produksjon av ein kilo kjøt for om lag 16 kg CO2-utslepp, mens produksjonen av ein kilo poteter berre står for 0,2 kg CO2.
Lokal mat
Auka forbruk av lokal mat kan ha dobbelt heldig effekt for reiselivet. For det første sparar ein miljøet for store transportutslepp. For det andre kan reiselivet tene på å tilby ein meir lokal profil på menyen fordi ein lokal matprofil kan bidra til å gje turisten ei meir autentisk oppleving. I tillegg kan samarbeid mellom lokale matvareprodusentar og serveringsstader i mange tilfelle føre til auka verdiskaping lokalt.
Sesongmat
Ved å sesongtilpasse menyen kan ein også spare miljøet for store utslepp. For det første krev produksjon av mat mindre energi når den følgjer årstidene, og for det andre sparar ein store energimengder ved å kutte langtidsfrysing og -kjøling. Sesongtilpassing passar òg naturleg saman med bruk av lokal mat.
Økologisk
Det er debatt om kor stor klimaeffekt det gir å satse på økologisk mat (les meir under økologisk drift i delen om jordbruk). Generelt er det vanleg å hevde at økologisk mat har god effekt på klimaet. I økologisk matproduksjon er energiforbruket lågare enn i konvensjonelt jordbruk. I tillegg vert det ikkje nytta kunstgjødsel eller syntetiske sprøytemiddel. I Noreg er all økologisk godkjend mat merka med Debio sitt økomerke.
Restemat
Lite svinn er tenleg både for miljøet og for økonomien. Ein kan minske svinn gjennom tilpassing av porsjonar, og gjennom å planlegge menyen slik at ein utnyttar restar frå t.d. ein buffet i seinare rettar.
